Jógúrtsósa

Þessi sósa er bragðmikil og kælandi á sama tíma. Frábær með vel krydduðum mat og alveg örugglega góð með grillmatnum.

1 1/2 dl grísk jógúrt
2 msk. hvítvínsedik
3-4 hvítlauksgeirargeirar, smátt saxaðir
1-2 msk. steinselja, smátt söxuð
1 msk. ferskt kóríander, smátt saxað (má sleppa)
1 msk. graslaukur, smátt saxaður
salt og pipar
5 dropar Hermesetas sætuvökvi, eða 1/2 tsk. gerfistrásæta

Blandið öllu saman í skál og geymið í kæli í 2-3 klst. áður en bera á sósuna fram.

Einhvers konar Baba Ganoush (eggaldinmauk)

Baba Ganoush er eggaldinmauk sem ættað er frá Mið-Austurlöndum og er yfirleitt notað sem ídýfa fyrir brauð en það virkar líka vel sem sósa með ýmsum mat. Í upprunalegu uppskriftinni er notað tahini en hér er notast við sesamolíu og sesamfræ til að ná fram svipuðum áhrifum.

2 eggaldin (3 ef þau eru lítil)
sesamolía til að pensla með
1 laukur
3 msk. sesamolía
1/2 dl sítrónusafi
klípa af salti
1 msk. tamari-sojasósa
handfylli af kóríander
2-4 hvítlauksgeirar

Hitið ofninn í 200 °C. Skerið eggaldin í tvennt eftir endilöngu, leggið hlutana með hýðið niður á bökunarpappírsklædda ofnplötu og penslið yfir með sesamolíu. Bakið eggaldinhlutana í 20-30 mínútur og leyfið þeim síðan að kólna. Saxið lauk og steikið upp úr sesamolíu (þessu má sleppa). Skafið kjötið innan úr eggaldinhýðinu, t.d. með gaffli, og setjið í matvinnsluvél ásamt ölluð öðru hráefni. Látið vélina ganga þar til maukið er orðið vel samlagað og kælið maukið í a.m.k. 2 klst. áður en það er borið fram.

Rófustappa

Þessi uppskrift er upphaflega að fyllingu í indverskar pönnukökur en ég hef notað stöppuna eina og sér með kjúklingi. Uppskriftin birtist í 11. tbl. Gestgjafans 2008 og er hér birt með leyfi höfundar. Uppskriftin er örlítið breytt frá því sem sést í Gestgjafanum en kartöflum er skipt út fyrir rófur. Í stöppuna mætti einnig nota grasker og bæta við vorlauk, prófið ykkur áfram.

1 tsk. sinnepsfræ
2 msk. olía
1/2 laukur
2 hvítlauksgeirar, saxaðir
1/2 - 1 grænt eða rautt chili-aldin, saxað
1/2 msk. karrílauf (hér nota ég alltaf karrí de lux frá Pottagöldrum)
1/2 tsk. túrmerik
1 msk. sítrónusafi
400 g soðnar rófur, skornar í teninga (gott er hafa nokkrar gulrætur með)

Steikið sinnepsfræ í olíu þar til þau fara að skoppa. Bætið þá lauk út í og steikið þar til hann er orðinn gullinn. Bætið hvítlauk, chili-aldini og karrílaufum (karrí de lux) saman við og steikið aðeins áfram. Setjið túrmerik og sítrónusafa út í ásamt kartöflum og merjið saman.

Ég mæli með að þið notið svolítið af karríi til að krydda kjúklinginn eða það kjöt sem þið ætlið að matreiða og sérstaklega finnst mér gott að nota fituna sem hefur lekið af kjúllanum sem fituskammtinn minn. Það er æðislegt að gera stóra uppskrift og ég nota jafnan smáslatta af salti þegar ég stappa þetta saman eða strái því yfir eftir á.

Hveitikímskex

Hveitikímskex

15 g hveitikím
1/8 tsk. matarsódi (má sleppa)
1 msk. sykurlaust síróp frá DaVinci Gourmet, bragð eftir smekk (fæst í verslunum Kaffitárs)
1-1 1/2 msk. vatn
3 msk. olía til steikingar, bragðlítil

Blandið hveitikími, sírópi og vatni saman þannig að úr verði deig, álíka þykkt og miðlungsþykkur hafragrautur. Hellið olíu á góða, slétta, viðloðunarfría pönnu og dreifið úr hveitikímsblöndunni á pönnuna með skeið þannig að úr verði þunn, hringlaga kaka, gott er að hafa kökuna aðeins þykkari við jaðrana þar sem hún steikist mest. Stillið á meðalhita og steikið kökuna í u.þ.b. 7-10 mínútur á hvorri hlið. Óhætt er að snúa henni oftar en einu sinni til þess að tryggja að hún steikist jafnt. Kælið aðeins og berið fram með smjöri. Einnig má hafa kökuna ósæta og setja kryddjurtir í stað síróps en þá þarf að setja meira vatn í uppskriftina.

Kínverskur

Svei mér kominn tími á meiri mat.
Hér er kvöldmatur gærkvöldsins sem var tilraun en heppnaðist svo rosalega vel að hann verður að fá að fara niður á blað. Það má að sjálfsögðu nota hvaða kjöt sem er og nautakjöt eða kjúklingur myndi passa vel hér líka en í gær var það svínakjöt því ég er að spara og það var á tilboði.


Wok-grænmeti með sesamfræjum og svínakjöti


1/4 hvítkálshöfuð
1 blaðlaukur
1 rauðlaukur
2 paprikur
6 msk. olía
4-5 msk. sesamolía
5-6 msk. sesamfræ
4 msk. engiferrót, söxuð
3 chili-aldin, söxuð
4 msk. tamarind-sósa
3 msk. xylitol
600 g svínakjöt, skorið í bita eða strimla

Sneiðið allt grænmeti niður í granna, langa strimla. Hitið 3-4 msk. af olíu og 2-3 msk. af sesamolíu í djúpri pönnu eða wok-pönnu, bætið 3 msk. af sesamfræjum, 2 msk. af engiferrót og helmingnum af chili á pönnuna og steikið síðan grænmetið. Hellið 2-3 msk. af tamarind-sósu yfir og stráið 1 1/2 msk. af xylitoli ofan á. Hrærið vel í og steikið í u.þ.b. 10-15 mín.
Hitið afganginn af olíunum á annarri pönnu, bætið sesamfræjum, engiferrót og chili saman við og steikið svínakjöt í blöndunni. Hellið restinni af tamarind-sósunni yfir ásamt xylitolinu og steikið þar til kjötið er fullsteikt. Setjið saman á disk eftir smekk og hentisemi og dreypið t.d. sesamolíu yfir.

Pastasósa mínus pasta

Upprunalega á þessi sósa að vera með pasta og auk þess með slatta af rjómaosti en með lítilsháttar breytingum er hún fullkomin með kjúkling eða svínakjöti og jafnvel gæti verið gott að setja í hana mygluosta. Þegar ég elda þessa á ég yfirleitt kaldan kjúkling í ísskápnum og þar sem sósan er svo heit helli ég henni bara beint yfir kalt kjötið.

Pastasósa mínus pasta

3 msk. olía
4 hvítlauksgeirar, marðir
2 laukar, saxaðir
1-2 paprikur, saxaðar
1 chili-aldin, saxað, má sleppa
10 sveppir, sneiddir, má sleppa
4-5 tómatar, skornir í bita
1 1/2 msk. Italian seasoning frá McCormick
salt og pipar
2 tsk. fenníkufræ
1-2 msk. majónes

niðurskorinn kjúklingur eða svínakjöt eftir smekk

Setjið olíu og hvítlauk í rúmgóðan pott og hitið en ekki láta hvítlaukinn steikjast. Setjið lauk saman við og glattið svolitla stund, ekki brúna. Setjið papriku og chili-aldin saman við og steikið áfram. Látið sveppi að lokum út í og steikið stutta stund. Setjið tómata saman við og hrærið vel, kryddið með með Italian seasoning, salti, pipar og fenníkufræjum og hitið í u.þ.b. 5 mínútur. Ef ykkur finnst sósan of vökvamikil getur verið gott að láta hana malla svolítið áfram og leyfa vökvanum að gufa upp. Setjið kjúkling eða svínakjöt í skál, ausið sósunni yfir og hærið majónes út í. Berið fram með fersku salati.

Nautahakk með fetaosti og blómkálsmús

Þessi réttur er ótrúlegalega mikill miðvikudagsréttur, of góður fyrir mánudaga en samt ekki svona gourmet veislumatur fyrir helgarnar. Blómkálsmúsin hentar rosalega vel með fleiri réttum þar sem venjan er að hafa kartöflumús og meira að segja kallinum mínum, sem þó elskar kartöflur, finnst þessi mús algjört sælgæti. Það er rosalega þægilegt að elda þennan rétt í nægu magni svo hægt sé að hafa hann í hádegismat daginn eftir.

Nautahakk með fetaosti

2/3 krukka af fetaosti (eða meira eftir smekk)
500 g nautahakk
3 hvítlauksgeirar, pressaðir
1-2 msk. Italian Seasoning frá McCormick (eða rósmarín, tímían og oregano)
salt og svartur pipar

Hellið olíu af fetaosti á pönnu og steikið hakk á háum hita þar til það er nánast allt orðið brúnað. Kryddið með hvítlauk, kryddjurtum og salti og pipar á meðan kjötið er að steikjast. Setjið fetaost út í hakkið og hrærið í því. Hægt er að stjórna því hversu mikið osturinn bráðnar, hann getur orðið að sósu sem umlykur allt kjötið eða í bitum í kjötinu, þetta veltur á því hversu snemma osturinn er settur saman við hakkið.

Blómkálsmús

1 blómkálshaus
1/3 sellerírótarhaus
10 dropar Hermesetas-sætuvökvi
salt og pipar
múskat (má sleppa)
2-3 msk. smjör

Takið blómkálshaus í sundur og skerið í hæfilega stóra bita, skerið sellerírót í smáa bita og setjið ásamt blómkáli í pott með sjóðandi vatni. Sjóðið í u.þ.b. 10 mín. eða þar til blómkálið verður meyrt, gætð þess að mauksjóða það ekki. Sigtið vatnið frá blómkálinu og sellerírótinni og maukið bitana í matvinnsluvél. Setjið sætuefni og krydd saman við og hrærið svolítið áfram þar til engir stórir bitar eru eftir í maukinu. Setjið smjör í pottinn, hellið blómkálsmaukinu saman við steikið það í smjörinu stutta stund, hrærið vel í á meðan og alls ekki láta blómkálsmaukið brúnast.

Berið hakkið og fetaostinn fram með blómkálsmauki, fersku, blönduðu salati og salatdressingu.

Salatdressing/kryddlögur

Þetta er salatdressingin sem gerði mér kleift að borða allt grænmetið sem maður þarf á að halda þegar maður hendir kolvetnunum út. Þessi blanda er líka mjög sniðug sem kryddlögur á lambakjöt og grænmeti sem á að elda. Það er mjög þægilegt að búa til stóran skammt í einu því dressingin geymist mjög vel í lokuðu íláti í kæliskáp.

Salatdressing


2/3 dl Dijon-sinnep
1/2 msk. svartur pipar
1 msk. Italian seasoning-kryddblanda (eða tímían, óreganó og rósmarín)
1-1 1/2 msk. balsamedik
1/2 msk. tamarind-sósa, má sleppa
3 hvítlauksgeirar, pressaðir
2-3 tsk. sítrónusafi, má sleppa
1/2 msk. Hermesetast-sætudropar
1 dl olía

Setjið allt saman í skál og hrærið vel með gaffli þar til allt er vel samlagað og olía og sinnep hætt að skiljast að. Þegar búin er til stór uppskrift má setja allt nema olíu í matvinnsluvél, þeyta saman og hella síðan olíunni saman við á meðan vélin gengur.
Það er hægt að nota Xylitol eða canderel í staðinn fyrir sætudropana en þá þarf svolítið meira magn.

Þessi dressing flokkast undir fitu eftir að hún er blönduð en hægt er að mæla olíuna á undan og blanda síðan öllu kryddinu og sinnepinu saman við.

Hveitikímskex

Þetta undarlega mjöl sem kallast hveitikím (a.t.h. ekki klíð) samræmist einhverra hluta vegna kolvetnislausu mataræði og hægt er að búa til úr því gerfibrauðsneiðar, pizzubotna og fleira. Hveitikím fæst í tveimur gerðum; annars vegar ljóst, ferskt hveitikím sem þarf að geyma í kæli og hins vegar dökkt, þurrkað hveitikím sem ekki þarf að geyma í kæli. Þurrkað hveitikím loðir illa saman og þess vegna á ég alltaf við ferskt hveitikím í uppskriftunum mínum nema annað sé sérstaklega tekið fram.

Hveitikímskex

30 g hveitikím
25-30 g sykurlaust síróp frá Da Vinci, bragð að eigin vali
1 msk. vatn
4-5 msk. olía til steikingar

Hrærið saman hveitikím, síróp og hluta af vatni. Bætið meira vatni saman við þar til blandan er orðin "slummu"-þykk. Blandan á ekki að leka of auðveldlega en heldur ekki að vera svo þykk að hún leki ekkert.
Setjið olíu á pönnu en ekki forhita pönnuna. Setjið helluna á hæsta styrk um leið og þið byrjið að setja hveitikímsblönduna á pönnuna. Dreifið mjög vel úr blöndunni þannig að hún líkist pönnuköku, gott er að hafa hana aðeins þynnri í miðjunni en við endana því endarnir steikjast mest.

Hveitikím getur verið svolítið erfitt í eldun því það blæs ekki út eða "lokar sér" eins og blanda úr eggjum og hveiti, þess vegna er mikilvægt að nota góða, viðloðunarfría pönnu sem ekki er farin að skemmast eða er orðin gróf. Einnig er gott að nota breiðan en þunnan spaða til að snúa kexinu við.

Steikið kexið dágóða stund á fyrstu hliðinni, sveiflið pönnunni örlítið svo olían leki yfir efri hlið kökunnar. Lækkið hitann og snúið kökunni við, þetta getur þurft að endurtaka nokkrum sinnum til þess að kakan bakist jafnt og brenni ekki. Kælið kökuna og berið síðan fram volga með smjörklípu.

Steiktur þorskur og sultaður laukur

Auðvitað fékk ég svo kast yfir því hver fyrsta uppskriftin ætti að vera og í framhaldinu ákvað ég að setja inn kvöldmatinn minn í kvöld. Hann var einfaldur og hversdagslegur og á það fullvel skilið að fá að prýða þessa síðu sem fyrsta uppskriftin.
Þegar ég var hálfnuð með eldamennskuna fékk ég þá flugu í höfuðið að sultaður rauðlaukur gæti passað vel með þessu og viti menn - það reyndist rétt a.m.k. hvað mína bragðlauka varðar.

Steiktur þorskur

2 egg
2 dl sojahveiti
krydd, t.d. sítrónupipar, kóríander og hvítlaukssalt
1 1/2 stórt þorskflak
olía til steikingar
sítrónusafi, má sleppa

Brjótið egg í djúpan disk og hrærið vel með gaffli. Setjið sojahveiti í annan djúpan disk og blandið kryddi vel saman við. Skerið þorskflak í hæfilega stóra bita og veltið fyrst upp úr eggjahræru og síðan upp úr sojahveiti. Hitið olíu á pönnu og steikið þorskbitana, kreystið sítrónusafa yfir fiskinn rétt áður en hann er fullsteiktur. Berið fram með soðnum rófum, sultuðum lauk og setjið smjörklípu og salt ofan á. Mæli líka með mjólkurglasi með þessu öllu saman.

Sultaður laukur - grunnuppskrift

3 rauðlaukar, gróft saxaðir
3-4 msk. olía, til steikingar
1/2 - 2/3 dl balsamedik
1/2 dl vatn
2-3 msk. Hermesetas-sætudropar, einnig má nota Canderel-strásætu)
2 tsk. engifer, eða 1 cm söxuð engiferrót
sítrónusafi, má sleppa

Steikið lauk í olíu í potti þar til hann verður glær, ekki brúna. Hellið balsamediki yfir laukinn og bætið svolitlu vatni saman við. Setjið sætudropa út í og hrærið vel í. Bætið engifer og sítrónusafa saman við, lækkið hitann og leyfið lauknum að malla í 10-15 mín. Hrærið reglulega í pottinum. Til að byrja með er svolítill vökvi á lauknum sem gufar síðan upp og eftir situr dökkur og karamellaður laukur. Þessa uppskrift er gott að stækka, t.d. fyrir jólin, því laukurinn geymist vel í lokuðu íláti í kæli.

Þessi uppskrift varð til eftir að villibráðarbæklingur Nóatúns datt inn um lúgun hjá mér fyrir jólin 2006. Þar var sultaður laukur sem var örugglega ekkert líkur þessum og í uppskriftinni var örugglega 1/2 kg af sykri. En það var nafnið sjálft sem kveikti hugmyndina og ég linnti ekki látum fyrr en þetta dásamlega meðlæti hafði litið dagsins ljós. Sultaður laukur passar rosalega vel með villibráð (lamb meðtalið) og nautakjöti og með slíkum máltíðum er ekki verra að hafa smjörsteikta sveppi við hliðina á honum. Það var bara núna í kvöld sem ég áttaði mig á því hvað hann passar vel með steikta þorskinum, breytti allri máltíðinni hreinlega í hið mesta sælgæti.