Kryddmiklar kjúklingabollur

Fékk hugmyndina af þessum frá facebook-hóp sem ég er í og skáldaði svo alls konar krydd saman við hana.

600 g kjúklingahakk eða úrbeinuð kjúklingalæri
2 egg
rífleg handfylli af fersku kóríander
6-10 hvítlauksgeirar
2-3 chili-aldin, fræhreinsuð
salt og pipar eftir smekk


Setjið allt nema kjúkling og egg í matvinnsluvél og maukið vel. Bætið kjúklingnum og eggjunum saman við og látið vélina ganga þar til blandan er orðin lík kjötfarsi.
Hitið ríflega af olíu á pönnu, búið til litlar bollur úr kjúklingablöndunni og steikið á öllum hliðum. Einnig má brúna bollurnar og hita síðan áfram í ofni.
Þessi réttur er frábær með steiktu graskeri og rauðlauk ásamt Baba Ganoush (sjá uppskrift hér fyrir neðan).

Kínverskur

Svei mér kominn tími á meiri mat.
Hér er kvöldmatur gærkvöldsins sem var tilraun en heppnaðist svo rosalega vel að hann verður að fá að fara niður á blað. Það má að sjálfsögðu nota hvaða kjöt sem er og nautakjöt eða kjúklingur myndi passa vel hér líka en í gær var það svínakjöt því ég er að spara og það var á tilboði.


Wok-grænmeti með sesamfræjum og svínakjöti


1/4 hvítkálshöfuð
1 blaðlaukur
1 rauðlaukur
2 paprikur
6 msk. olía
4-5 msk. sesamolía
5-6 msk. sesamfræ
4 msk. engiferrót, söxuð
3 chili-aldin, söxuð
4 msk. tamarind-sósa
3 msk. xylitol
600 g svínakjöt, skorið í bita eða strimla

Sneiðið allt grænmeti niður í granna, langa strimla. Hitið 3-4 msk. af olíu og 2-3 msk. af sesamolíu í djúpri pönnu eða wok-pönnu, bætið 3 msk. af sesamfræjum, 2 msk. af engiferrót og helmingnum af chili á pönnuna og steikið síðan grænmetið. Hellið 2-3 msk. af tamarind-sósu yfir og stráið 1 1/2 msk. af xylitoli ofan á. Hrærið vel í og steikið í u.þ.b. 10-15 mín.
Hitið afganginn af olíunum á annarri pönnu, bætið sesamfræjum, engiferrót og chili saman við og steikið svínakjöt í blöndunni. Hellið restinni af tamarind-sósunni yfir ásamt xylitolinu og steikið þar til kjötið er fullsteikt. Setjið saman á disk eftir smekk og hentisemi og dreypið t.d. sesamolíu yfir.

Pastasósa mínus pasta

Upprunalega á þessi sósa að vera með pasta og auk þess með slatta af rjómaosti en með lítilsháttar breytingum er hún fullkomin með kjúkling eða svínakjöti og jafnvel gæti verið gott að setja í hana mygluosta. Þegar ég elda þessa á ég yfirleitt kaldan kjúkling í ísskápnum og þar sem sósan er svo heit helli ég henni bara beint yfir kalt kjötið.

Pastasósa mínus pasta

3 msk. olía
4 hvítlauksgeirar, marðir
2 laukar, saxaðir
1-2 paprikur, saxaðar
1 chili-aldin, saxað, má sleppa
10 sveppir, sneiddir, má sleppa
4-5 tómatar, skornir í bita
1 1/2 msk. Italian seasoning frá McCormick
salt og pipar
2 tsk. fenníkufræ
1-2 msk. majónes

niðurskorinn kjúklingur eða svínakjöt eftir smekk

Setjið olíu og hvítlauk í rúmgóðan pott og hitið en ekki láta hvítlaukinn steikjast. Setjið lauk saman við og glattið svolitla stund, ekki brúna. Setjið papriku og chili-aldin saman við og steikið áfram. Látið sveppi að lokum út í og steikið stutta stund. Setjið tómata saman við og hrærið vel, kryddið með með Italian seasoning, salti, pipar og fenníkufræjum og hitið í u.þ.b. 5 mínútur. Ef ykkur finnst sósan of vökvamikil getur verið gott að láta hana malla svolítið áfram og leyfa vökvanum að gufa upp. Setjið kjúkling eða svínakjöt í skál, ausið sósunni yfir og hærið majónes út í. Berið fram með fersku salati.

Nautahakk með fetaosti og blómkálsmús

Þessi réttur er ótrúlegalega mikill miðvikudagsréttur, of góður fyrir mánudaga en samt ekki svona gourmet veislumatur fyrir helgarnar. Blómkálsmúsin hentar rosalega vel með fleiri réttum þar sem venjan er að hafa kartöflumús og meira að segja kallinum mínum, sem þó elskar kartöflur, finnst þessi mús algjört sælgæti. Það er rosalega þægilegt að elda þennan rétt í nægu magni svo hægt sé að hafa hann í hádegismat daginn eftir.

Nautahakk með fetaosti

2/3 krukka af fetaosti (eða meira eftir smekk)
500 g nautahakk
3 hvítlauksgeirar, pressaðir
1-2 msk. Italian Seasoning frá McCormick (eða rósmarín, tímían og oregano)
salt og svartur pipar

Hellið olíu af fetaosti á pönnu og steikið hakk á háum hita þar til það er nánast allt orðið brúnað. Kryddið með hvítlauk, kryddjurtum og salti og pipar á meðan kjötið er að steikjast. Setjið fetaost út í hakkið og hrærið í því. Hægt er að stjórna því hversu mikið osturinn bráðnar, hann getur orðið að sósu sem umlykur allt kjötið eða í bitum í kjötinu, þetta veltur á því hversu snemma osturinn er settur saman við hakkið.

Blómkálsmús

1 blómkálshaus
1/3 sellerírótarhaus
10 dropar Hermesetas-sætuvökvi
salt og pipar
múskat (má sleppa)
2-3 msk. smjör

Takið blómkálshaus í sundur og skerið í hæfilega stóra bita, skerið sellerírót í smáa bita og setjið ásamt blómkáli í pott með sjóðandi vatni. Sjóðið í u.þ.b. 10 mín. eða þar til blómkálið verður meyrt, gætð þess að mauksjóða það ekki. Sigtið vatnið frá blómkálinu og sellerírótinni og maukið bitana í matvinnsluvél. Setjið sætuefni og krydd saman við og hrærið svolítið áfram þar til engir stórir bitar eru eftir í maukinu. Setjið smjör í pottinn, hellið blómkálsmaukinu saman við steikið það í smjörinu stutta stund, hrærið vel í á meðan og alls ekki láta blómkálsmaukið brúnast.

Berið hakkið og fetaostinn fram með blómkálsmauki, fersku, blönduðu salati og salatdressingu.

Hið alræmda beikonsalat

Ég er enn þá í hversdagsmatnum. Kannski vegna þess að ég er að spara veisluföngin en kannski bara vegna þess að hversdagsmatur á svo stóran sess í lífi mínu, ég borða hann jú, oftar en fíneríið.
Þetta beikonsalat er búið að vera á matseðlinum hjá mér nánast upp á hvern einasta dag (stundum meira að segja tvisvar á dag) í heilt ár og ekki að ástæðulausu.

Beikonsalat

1 kjúklingalæri
Eðal-kjúklingakrydd frá Pottagöldrum
1 pk. beikon (því þyngri því betra)

Hitið ofninn í 200°C. Kryddið kjúklingalæri með kjúklingakryddi (eða öðru kryddi að eigin vali) og eldið í u.þ.b. 45 mín. Steikið beikon á pönnu eða á álpappír í ofni. Skerið kjúkling og beikon í litla bita eða teninga.

Sætar gulrætur:
150 - 200 g gulrætur, skornar í sneiðar
2 msk. bragðlítil olía, t.d. ísíó4
1-1 1/2 msk. Hermesetas sætudropar

Sjóðið gulrætur 5 mínútur, hellið vatninu af og setjið pottinn aftur á heita helluna. Hellið olíu yfir gulræturnar ásamt sætudropum og steikið í u.þ.b. 10 mínútur.

Salat:
icebergsalat
gúrka
tómatar
paprika
rauðlaukur

1 msk. Helmans-majónes

Skerið helling af grænmeti niður eftir smekk og hentisemi. Setjið kjúkling, beikon, steiktar gulrætur og majónes saman við og hrærið vel saman.

Ástæðan fyrir því að þetta salat er svo oft í matinn hjá mér er sú að það er svo auðvelt að hafa það með sér í nesti. Vegna þess að ég hef góða aðstöðu í vinnunni set ég kjúklinginn, beikonið og gulræturnar í sér box og hita upp áður en ég blanda því saman við salatið og majónesið. Til að flýta enn frekar fyrir elda ég yfirleitt heilan pakka af kjúklingalærum í einu og á í kæli til að grípa í á hverju kvöldi, það sama gildir um gulræturnar. Það er rosalega gott að setja eplabita út í þetta salat og "spari" sleppi ég kjúklingnum og hef tvöfaldan skammt af beikoni.

Einu kjúklingabringurnar sem ég borða eru frá Móa því aðrar kjúklingabringur innihalda yfirleitt sykur. Það sama gildir um kjúklingalæri því núna fyrir stuttu bætti Holtakjúklingur sykri í innihaldslýsinguna á kjúklingalærunum sínum.